Sun’iy intellekt imkoniyatlari prokuratura tizimida ham keng qo‘llaniladi

Bugun Bosh prokuraturada «Sun’iy intellekt imkoniyatlarini prokuratura tizimiga joriy qilish» mavzusida davra suhbati o‘tkazildi.

Unda Bosh prokuratura, Huquqni muhofaza qilish akademiyasi, Qoraqalpog‘iston Respublikasi, viloyatlar va Toshkent shahar, O‘zbekiston Respublikasi Harbiy va Transport prokuraturasi, Bosh prokuratura huzuridagi Departamentning mas’ul xodimlari ishtirok etdi.

Tadbirda O‘zbekiston Milliy media birlashmasi Boshqaruvi raisi, O‘zbekiston jurnalistika va ommaviy kommunikatsiyalar universiteti rektori, professor Sherzodxon Qudratxo‘ja, «AIM Laboratory» MChJ rahbari Xikmatilla Ubaydullayev, «XCDM» MChJ rahbari Samandar Tursunaliyev, texnobloger Sadulla Abdullayevlar ishtirok etib, bugungi mavzu yuzasidan nutq so‘zladi.

So‘zga chiqqanlar sun’iy intellekt texnologiyalarini jadal joriy etish va ularni mamlakatimizda keng qo‘llash, raqamli ma’lumotlardan foydalanish imkoniyatini va ularning yuqori sifatini ta’minlash, ushbu sohada malakali kadrlar tayyorlash uchun qulay shart-sharoitlar yaratish borasida o‘z fikr va ma’lumotlarni, tushuntirishlarni berib o‘tishdi.

Do‘stona va samimiy ruhda bo‘lib o‘tgan suhbat davomida ishtirokchilar ham mavzu yuzasidan o‘zlarining fikr-mulohazalarini bildirdilar.

Ma’lumot uchun: Prokuratura organlari tizimida faoliyat olib boruvchi xodimlarni yetuk kadr bo‘lib shakllanishi, mamlakatimizda va dunyoda sodir bo‘layotgan ahamiyatli islohot va o‘zgarishlarni ularga o‘z vaqtida yetkazish hamda ma’naviy-ma’rifiy va tarbiyaviy ishlar samaradorligini oshirish maqsadida har haftaning juma kuni “Ma’naviyat kuni” etib belgilangan.